Թարմ ուղեղով՝ դառը սուրճի հետ
Հայաստանի մարտահրավերներից մեկը, ես կասեի՝ գլխավորը, ժողովրդագրությունն է: 30 հազար քառակուսի կիլոմետր տարածքի վրա 3 միլիոնից պակաս մարդ է բնակվում:
Ավելին, մոտ 2 միլիոնը կենտրոնացած է Երևանում և շրջակայքում: Մեր հանրապետությանը խիստ անհրաժեշտ է ապակենտրոնացում, բայց այդ ուղղությամբ պետական քաղաքականություն չի տարվում ցավոք:
Արցախից բռնի տեղահանված մեր հայրենակիցների հետ աշխատելու ընթացքում նկատեցի, որ Արցախում բազմազավակ ընտանիքներին տրվել է պետական աջակցություն, ինչը շատ ճիշտ է:
Այսօր այդ ընտանիքները, որոնք հաստատվել են Հայաստանի հեռավոր գյուղական վայրերում, օգնության և ուշադրության խիստ կարիք ունեն: Անձամբ հանդիպել եմ 5 և ավելի երեխաներ ունեցող երիտասարդ ընտանիքների, որոնց կեցությունը հեռու է բավարար լինելուց:
Այս բազմազավակ ընտանիքները պետք է լինեն պետության ուշադրության կենտրոնում երկու պատճառով առնվազն՝
ա/ այդ ընտանիքները, իրավամաբ, կարիքի ու նեղության մեջ են,
բ/ երբ պետությունը բավարար չափով ուշադրություն չի դարձնում նրանց կարիքներին, ապա դա ուղերձ է բոլոր այն ընտանիքներին, ովքեր ուզում են 3-ից ավելի երեխաներ ունենալ:
Հայաստանի արևելյան հարևան Ադրբեջանն ունի 10 միլիոնից ավելի բնակչություն, արևմտյան հարևան Թուրքիան՝ մոտ 90 միլիոն, հարվային հարևան Իրանը՝ մոտ 90 միլիոն: Մեր հյուսիսային հարևան Վրաստանը մեր օրին է…
Հայաստանը ուժեղ կարող է լինել, եթե ունենա ավելի շատ բնակչություն, եթե մեր սահմանային գյուղերի տները դատարկ չլինեն, եթե ամեն կտոր հողը մշակվի:
Թ. Հ.
Նոր Նորք, Երևան, 29 դեկտեմբեր, 2023թ
