Hasan Oktay: Türk Dövlətləri Təşkilatının 12-ci zirvəsi əsasən sülh və təhlükəsizlik mövzularına yönəlmişdi
Türkiyəli politoloq Hasan Oktay bildirib ki, Azərbaycanın mühüm mərkəzlərindən olan Qəbələdə keçirilən Türk Dövlətləri Təşkilatının 12-ci zirvəsi əsasən sülh və təhlükəsizlik mövzularına yönəlmişdi:
“Toplantıda elektron, hərbi, siyasi və sosial təhlükəsizlik sahələrində güvən məsələlərinin Türk dövlətləri üçün son dərəcə vacib olduğu bütün iştirakçı liderlər tərəfindən vurğulanıb. Ukrayna və Yaxın Şərqdəki münaqişələrin davam etməsi, eləcə də İran və ABŞ, İsrail arasındakı gərginlik TDT üçün təhlükəsizlik məsələsini ön plana çıxarıb.
Azərbaycan Prezidenti İlham Əliyevin Türk hərbi birliklərinin birgə təlim keçməsi təklifi yaxın günlərdə daha geniş müzakirə olunacaq. Bu, ortaq hərbi təşkilatın formalaşmasının yolunu açacaq. NATO və ya Varşava Paktı tipli bir hərbi ittifaqdan fərqli olaraq, hər bir dövlətin öz ordusunu ən müasir silahlarla təchiz etməsi və birlikdə fəaliyyət göstərə biləcək bir komanda mərkəzinin yaradılması həm maliyyə xərclərini azaldır, həm də daha effektiv nəticələr verir.
Hazırda TDT-nin həll etməli olduğu digər məsələlər olduğundan, ordu məsələsi gələcək toplantılara saxlanılması daha məqsədəuyğundur. Şərq ilə Qərb arasında körpü rolunu oynayan Türk Dövlətləri Təşkilatı sülh, təhlükəsizlik və sabitliyi ön plana çıxararaq, Avropa İttifaqı və ya Şanxay Əməkdaşlıq Təşkilatı kimi dünyada nüfuz qazanacaq yeni bir qurum olaraq prioritetlərini müəyyən etməlidir.
Ortaq ordudan daha çox, ortaq hərbi təşkilatın formalaşdırılması və bütün orduların birlikdə fəaliyyət göstərə biləcəyi bir komanda mərkəzinin yaradılması gözləntilər üçün daha möhkəm və dayanıqlı təməl yaradır”.
Mehin Mehmanqızı
https://moderator.az/az/herb/915453/turk-dunyasi-birlesir-yeni-herbi-ittifaqin-esasi-qoyulur-sensasion-aciqlamalar/
Share this content:
Yorum gönder