Թարմ ուղեղով՝ դառը սուրճի հետ
Ժամանակին շատ ենք գրել, որ չպետք է հույս դնել երրորդ ուժի վրա՝ լինի Ռուսաստանը, Եվրոպան կամ ԱՄՆ-ն: Հիմա էլ ենք նույն կարծիքին: Չպետք է հույս դնել երրորդ ուժի վրա, քանի որ երրորդ ուժը, հաշվի առնելով ի՛ր շահերը, կարող է հեռանալ և մեզ միայնակ թողնել, ինչպես եղավ շաբաթներ առաջ:
Ռուսաստանը երրորդ անգամ է մեզ մենակ թողնում: Եթե նախկին երկու դեպքերում ռուսական զորքերը անկանոն, գլխապատառ լքում էին Կովկասյան ճակատը, որից հետո հակառակորդ ուժերը առաջ էին շարժվում և կոտորում մեր ժողովրդին, ապա 2023թ սեպտեմբերի դժնդակ օրերին ռուս խաղաղապահների աչքի առաջ տեղի ունեցավ Արցախի ավելի քան 100 հազար հայերի բռնի տեղահանումն ու հայրենազրկումը: Ու հիմա Պուտինը և նրա պրոպագանդան ամբողջ մեղքը թափում են Հայաստանի վրա:
Ի դեպ, ես բացարձակապես չեմ մեղադրում Ռուսաստանին կամ Պուտինին: Նրանք ունեն իրենց շահերը, ինչպես Եվրոպան և ԱՄՆ-ն ունեն իրենց շահերը: Այդ մենք ենք հերթական անգամ, հակառակորդի հետ ուղիղ խոսելու և նվազագույնը փրկելու փոխարեն հենվում երրորդ կողմի վրա և կորցնում ամեն ինչ:
Թ. Հ.
Նոր Նորք, Երևան, 10 հոկտեմբեր, 2023
