İraqın regional Kürd muxtariyyətinin başçısı Məsud Bərzaninin Sentyabrın 25-də keçirmək istədikləri müstəqillik referendumu ertələnə bilər. Hazırda Bağdad-Ərbil və Bağdad-Vaşinqton arasında konfedensial ciddi diplomatik danışıqlar gedir. ABŞ-ın dövlət katibi Tillerson muxtariyyətin başçısı Barzani ilə telefon danışığında referendumun təxirə salınmasını xahiş edib. Çox gümanki, ABŞ İraqda vəziyyətin daha da mürəkkəb olacağından irəli gələrək, hələlik referendumu ertələmək niyyətindədir. Amma Şimali İraqda referendum planı ABŞ-ın regionda strateji planıdır. Buna baxmayaraq, Barzani nə qədər referendumda israr etsədə, ABŞ-ın sözündən heç vaxt çıxa bilməz.

Qeyd edim ki, Ərbillə mərkəzi hökumət arasında bir sıra şərtlər altında danışıqlar gedir. Burada əsasən kürdlərə imtiyazların tanınması və mübahisəli bəzi əraziləri muxtariyyətin idarəsinə verməkdə daxildir. Bağdad hakimiyyəti kürdlərin tələblərin yerinə yetirsə, kürdlər daha da güclənəcək və gələcəkdə müstəqillik referendumunu daha da rahat keçirə bilər. Hazırda isə, nəzərdə tutulan referendum daha da ciddi problemlərə yol aça bilər. İraq hakimiyyəti ölkənin suverenliyi üçün kürdlərin şərtlərini qəbul edə bilər. ABŞ məhz İraqda, İranın təsirini zəiflətmək üçün regional muxtariyyətin təzyiqlərindən Bağdada qarşı gələcəkdə istifadə edəcək.
Məhəmməd Əsədullazadə
Cənubi Qafqaz Təhlükəsizlik və Sülh Institutunun sədri