24 il əvvəl bu gün böyük tarixçi, ictimai və siyasi xadim, əfsanəvi qəhrəman, akademik Ziya Bünyadov vəhşicəsinə qətlə yetrildi. Bu qətl Azərbaycan xalqında böyük hiddət və qəzəb doğurdu. Lakin bir sıra adamlar həbs edilsə də, qətlin üstü açılmadı. 2005-ci ilin mart ayının 10-da məşhur killer, Daxili İşlər Nazirliyinin yüksək vəzifəli və yüksək rütbəli əməkdaşı Hacı Məmmədovun adam oğurluğu və qətlləri ilə məşğul olan dəstəsi həbs edildi. Mart ayının 11-də Milli Təhlükəsizlik Nazirliyi və Baş Prokurorluq uzun müddət ölkədə adam oğurluğu və digər ağır cinayətlər törətmiş kriminal dəstənin ifşa olunması barədə məlumat yaydı. Həmin məlumatda göstərilirdi ki, məşhur alim, akademik Ziya Bünyadova atəş açılan silah bu dəstədən çıxıb. Amma nədənsə sonra həmin silah və həmin epizod Hacı Məmmədov və onun dəstəsinin törətdiyi əməllərlə bağlı istintaq işindən çıxarıldı.
Cemil Hasanlı