Bu gün Azərbaycanda XX əsrin ən böyük ideoloqlarından biri, Cümhuriyətimizin banisi Məhəmməd Əmin Rəsulzadənin doğum günüdür. Adı gələndə hər birimizin üzünə qürurun, şərəfin,bayrağın,hürriyətin nuru səpələnir.
“Millətlərə istiqlal, insanlara hürriyyət” deyərək Azərbaycan türklərinin dövlət anlayışının necə bir fəlsəfəyə söykəndiyini hələ 100 il bundan öncə dünyaya isbat etdi. Tarixdə dövlət qura bilən bir xalq olmağımız Rəsulzadənin qurduğu Cümhuriyyəti ilə reallaşdı.
Amma biz onu sadəcə dövlət qurduğu üçün sevmirik. Yaşadığı ömür yolu bənzərsizdir…
Bayıl türməsi, Stalinin Bakıya gəlişi, Novxanıda ailəsiylə son görüş, balaca Azərin bələyindən gələn bənzərsiz qoxu, Stalinlə bir vaqonda Moskvaya səfər, bir «çust»da keçirdiyi şaxtalı Moskva qışı, ilk çəkmənin sevinci, Stalinin onu öz tərəfinə çəkmək yolunda çabaları, hər təklifinə «yox» cavabı alan «dost»un «əcaib insandır Rəsulzadə» sözü, Fin körfəzi ilə gizli və qorxulu qaçış, neçə-neçə ölkədən sonra başlayan Türkiyə həyatı…
Ümidsiz mühacirət illəri. Pulsuzluq, otaqlarda qaçışan siçovullar, təzədən Türkiyədən çıxarılma, Avropa həyatı, çıxardığı dərgilər, yazdığı kitablar, Sovetlərin iç üzünü açan çalışmalar, silahdaşlarının vaxtlı-vaxtsız ölümü, Vətəndən gələn faciəli xəbərlər…
Sonra yenə Türkiyədən çıxarılma, yenə yad ölkələr, Vətəndən gələn qara xəbərlər, ölüm-itimlər, xəyanətlər, ittihamlar, yaşlanmalar…
Amma yoldan dönmək yox!
Amma dəyişmək yox!
Mübarizəyə davam!
Azərbaycanın gələcəyinə olan inam çox güclüdür.
O qədər güclüdür ki, ölmək istəmirsən…
Sonu görmək istəyirsən…
Bu, böyük Məhəmməd Əmin Rəsulzadə yoludur, yoxdan dövlət yaradan kişinin ömür yolu… Onun əqidəsidir, onun mübarizəsidir.
Millətimizin mədəni dünya millətləri arasında yaşaya bilməsi üçün lazım gələn hər şeyi yazan, düşünən, çalışan, özünün və ailəsinin həyatını fəda edənlərin başında kim gəlir deyə soruşsanız, tək bir ad var: RƏSULZADƏ!
O, Azərbaycanda Cümhuriyyətin qurulması üçün bir çox sahələrdə çabalar göstərib, həyatını, ailəsini, doğmalarını bu yolda heçə sayıb. Özü görməsə belə, başladığı yol və apardığı mübarizənin sonu uğurla nəticələndi. Azərbaycan XX əsrin sonunda yenə müstəqil dövlət oldu. Və bu gün üçrəngli bayrağımız dövlət rəmzi kimi qürurla dalğalanır.
Cümhuriyyət özü bir fikir idi və elə bu düşüncə ilə dövlət qurmağa nail olmuşdu:
“Kommunizm nə edirsə-etsin, Rusiya imperializmi hansi rəngə girirsə-girsin, meydanda bir həqiqət var: “Millətlər özlərini tanımışlar, Azərbaycan özünün türk olduğunu idrak eyləmiş, böyük bir fikir doğulmuşdur: İSTİQLAL!
Bu milləti istiqlala qovuşduran Böyük Azərbaycanlı, dünyaya gəlişin qutlu olsun!
Yolundayıq,işığınla güclənir və yürüyürük!
