Putinin Azərbaycan gündəliyində təbii ki, Azərbaycandan maksimum iqtisadi fayda əldə etmək də, Cənubi Qafqazda Qərbə və demokratikləşmə “cəbhəsinə” qarşı vahid mövqe formalaşdırmaq da, avtoritar rejimlər klubunu ayaqda saxlamaq üçün yardımlaşmaq da önəmli yerlər tutur.

Ancaq ona da əminəm ki, 2020-ci ildən, konkret olaraq 2-ci Qarabağ savaşından sonra çox güclənmiş Azərbaycan – Türkiyə müttəfiqliyi Putini bərk narahat, hətta pərt edirdi. Ona görə də Azərbaycan – Rusiya münasibətlərini yenidən Azərbaycan – Türkiyə münasibətlərindən daha üstün etmək də Putinin əsas hədəflərindən biri idi.

Etiraf edək ki, Putin bu istiqamətdə artıq xeyli uğur qazanıb. Əvvəlcə 2022-ci ilin fevralın 22-də Azərbaycanla müttəfiqlik bəyannaməsi imzalamaqla ondan bir il öncə Azərbaycanın Türkiyə ilə imzaladığı müttəfiqlik haqda Şuşa bəyannaməsini kompensasiya etmiş oldu. Yəni ölkəsinin Azərbaycanla münasibətlərini Azərbaycan – Türkiyə münasibətləri səviyyəsinə qaldırdı. Bakıya bu səfərində isə Rusiya – Azərbaycan universiteti yaratmaqla Türkiyənin təhsil sahəsində əldə etdiyi üstünlüyü də sıfırladı. İndi Azərbaycan Türkiyə ilə olduğu kimi Rusiya ilə də müttəfiqdir, Türkiyə ilə olduğu kimi Rusiya ilə də ortaq universitet yaradır. Beləliklə, Putin Azərbaycanla münasibətlərdə Rusiyanın hüquqi baxımdan Türkiyə ilə bərabərləşməsinə, faktiki baxımdan isə hətta Türkiyədən də önə çıxmasına nail olur. Bir millət, iki dövlət düsturuna səmimi şəkildə inanmış soydaşlarımın diqqətini bu neqativ prosesə cəlb edirəm.

AXCP sədri