Թուրքիան վերջին տարիներին բավական հաջող է օգտագործում փափուկ ուժի քաղաքականությունը։ Մասնավորապես Կենտրոնական Ասիայի և ընդհուպ աֆրիկական տարբեր երկրներում օգտագործելով այդ դիվանագիտությունը՝ բազմասերիանոց ֆիլմերի, կրթօջախներ ստեղծելու և մշակութային և երիտասարդական կապերի միջոցով փորձում է իր ազդեցությունը տարածել հնարավորինս լայն շրջանակներում, Aysor.am-ի թղթակցի հետ զրույցում ասաց թուրքագետ Ռուբեն Սաֆրաստյանը։
«Երբ ես հետևում եմ հայ-թուրքական հարաբերությունների կարգավորման վերաբերյալ Թուրքիայից եկող արձագանքներին, կարելի է եզրակացնել, որ այդ երկիրը Հայաստանի նկատմամբ ևս փորձելու է կամ արդեն սկսում է կիրառել փափուկ ուժի քաղաքականությունը։
Դրա արտահայտումն է, օրինակ, Թուրքիայի կողմից արված հայտարարությունը, որ չվերթներ պետք է բացել ոչ միայն Երևան-Ստամբուլ, այլև, օրինակ, Վանի ուղղությամբ՝ զարգացնելու տուրիզմը։
Սրանք տարրեր են, որոնք վերաբերում են փափուկ ուժի քաղաքականությանը, այնպես որ, կարելի է ասել, որ Թուրքիան նախատեսում է Հայաստանի նկատմամբ ևս այդպիսի դիվանագիտություն իրականացնել»,- ասաց թուրքագետը։
