Մակրոնը եվրոլիդերների երկու խորհրդակցություն կազմակերպեց, եղան խրոխտ հայտարարություններ, որ կշարունակեն օգնությունը Ուկրաինային, որ իրենք հաստատակամ են և էլի նման բաներ: Քիչ էր մնում ԱՄՆ-ին ուղարկեին այնտեղ, որտեղից, որ եկել է: Կարճ ասած առյուծի կաթ էին խմել ուլտրալիբերալները: Այսօր հայտնի դարձավ, որ Սթարմերը Մակրոնի հետ հաջորդ շաբաթվա սկզբին գնում են Վաշինգտոն, որ տեսնեն շեֆը ինչ է ասում: Տեսնենք Թրամփի արձագանքը, չնայած դժվար չէ կռահել ինչ կասի եվրոհերոսներին, իսկ մինչ այդ նոր զոհեր և ավերածություններ Օդեսայում: Իհարկե առաջին տուժվածը ուկրաինացի հասարակ ժողովուրդն է, իր ցավի ու տառապանքի հետ: Եվրոպական Միության առաջատար քաշող ուժը Գերմանիան, որն իր տնտեսական պոտենցիալով գրեթե հասել էր հեգեմոնիայի, այժմ տեսնում է անհեռանկար հակառուսականության հետևանքները: Զրկվելով ռուսական էժան գազից, հսկայական կորուստներ կրելով արդյունաբերական ոլորտներում Շոլցը օրերն է հաշվում թե, երբ կգան ընտրությունները, որ «պատվով» հեռանա: Ինչ որ առումով ականատես եղանք Գերմանիայի դեինդուստրալիզացիային: Եվրոպայում հեգեմոնիայի համար հազարամյա պայքարը Ֆրանսիայի, Գերմանիայի և անգլոսաքսերի միջև շատ յուրօրինակ ավարտ է ունենում: 1918 և 1945 թթ. կրկնություն, այս անգամ Ուկրաինայում միջնորդավորված պատերազմում ֆիասկոյի տեսքով: Այս մասին նախազգուշացնում էին Բունդեսթագի ընդդիմադիր պատգամավորները: ԱՄՆ-ից եկող խտացված գազը դառնում է քաղաքական գործոն, Հյուսիսային Հոսք ոչնչացված գազատարների շիրիմի վրա: Իրավիճակից ելքեր փնտրող Մակրոնը փորձում է ֆրանկո-գերմանական բևեռի վերաձևման: Դրա համար էլ ԵՄ ղեկավարների խորհրդակցությանը հրավիրել էր նաև Բրեքսիթով ԵՄ-ից ամուսնալուծված Բրիտանիայի վարչապետին: Հիշենք նաև եվրոպական հեգեմոնիայի համար պայքարում Ֆրանսիան 20-րդ դարում առաջնագծում էր, բայց աջ ու ձախ հակազդեցության հզոր ինպուլսներ էր ստանում Լոնդոնից և Բեռլինից: Այնպես, որ արևմտամետ հայ քաղաքագիտունների դարակազմիկ կանխատեսումները միասնական ժողովրդավար Արևմուտքի փրկչական գլոբալ դերակատարման մասին ընդդեմ փորձանքաստեղծ ռուսների, վերածվում են քարոզչական փուչիկի: Բայց դե մարդիկ հո ձրի չեն վերլուծում, գործ են անում, ոչ մի տեղ չեն աշխատում, բայց լավ էլ ապրում են:
