ԱՄՆ-Ուկրաինա բանակցությունների արդյունքում ծնված առաջարկությունը Ռուսաստանին՝ «30 օրվա զինադադար», հարուցել է ողջ արևմտյան աշխարհի քաղաքական առաջնորդների միաձայն արձագանքը, թե այժմ գնդակը Կրեմլի դաշտում է: Ի դեպ եվրոլիդերների այդ արձագանքի մեջ կա թաքնահարույց հրճվանք և դա պատահական չէ, այլ պարզ հաշվարկի արդյունք է: Նրանք համոզված են, որ 30 օրվա զինադադարը և մերժելու, և ընդունելու պարագայում Զելենսկին շահած է դուրս գալու: Ինչու՞: Զինադադարը ընդունելու դեպքում, ուկրաինական կողմը շունչ քաշելու և ռազմաճակատում շղթայաբար շարունակվող անհաջողությունների ու կորուստների ներքաղաքական կործանարար ազդեցությունը կասեցնելու հնարավորություն է ստանում: Բացառված չեն ԵՄ երկրների կողմից նոր սպառազինությունների մատակարարումների ծավալների մեծացումը: Հաշվարկն այնպիսինն է, որ 30 օրից հետո ռուսական կողմի պայմանները կհամարվեն անընդունելի, տարածքներ չզիջելու երկաթյա տրամաբանությամբ և նորից կվերսկսվեն ռազմական գործողությունները, այնպես ինչպես, որ 2022 թ. պատերազմի սկսումից երկու ամիս անց տեղի ունեցավ: Եթե Կրեմլից մերժվի 30 օրյա զինադադարը, հիմք ընդունելով արդեն Պուտինի կողմից հրապարակված հայտնի նախապայմանները ՌԴ-ին միացված վարչատարածքային միավորների տարածքից ուկրաինական զորքերի դուրս բերման մասին, Կիևը կրկին շահեկան վիճակում է հայտնվելու: Զելենսկին և եվրոլիդերները միասնական քարոզչական գրոհ են սկսելու, Թրամփին ի ցույց դնելու, որ Պուտինի հետ հաշտությունն ու խաղաղությունն անհնարին է: Այդ դեպքում հնարավորություն է ստեղծվում վերսկսել ամերիկյան ռազմական մատակարարումները , հատկապես ուկրաինական հանքերի փոխհատուցուցման գնով: Սա կլինի երանելի վիճակ ԵՄ-ի համար, որովհետև նորից կազատվեն լրացուցիչ ռազմական ծախսերի բեռից: Դժվարանում եմ ասել, թե ռուս ստրատեգները այս երկու օրը ինչ պատասխան կտան, բայց այսպիսի առաջարկը Մոսկվայի համար լուրջ մարտահրավերներ է պարունակում և՛ ընդունելու, և՛ մերժելու պարագայում: Իհարկե իմ կարծիքը որևե նշանակություն չունի, բայց ամեն դեպքում կփորձեմ ձևակերպել պատասխանը: Այն չպետք է լինի ոչ մերժում, ոչ էլ ընդունում: ՌԴ շահերը թելադրում են հանդես գալ պատասխան առաջարկով: «Վերջնական, անժամկետ զինադադար և հետկոնֆլիկտային բանակցային գործընթաց սկսելու համաձայնագրի կնքում, ձևաչափի որոշումով»:
Գարիկ Քեռյան: ԱՄՆ-Ուկրաինան պայմանավորվել են Մոսկվային առաջարկի շուրջ
