Վրաստանը պատրաստվում է ՆԱՏՕ մտնելուն եւ տարածաշրջանային հավասարակշռության փոփոխությանը
Վրաստանի նախագահը Բրյուսելում հանդիպել է ՆԱՏՕ-ի գլխավոր քարտուղարի Յենս Ստոլտենբերգի հետ, ով նրան հրավիրել է 2018 թվականին Բրյուսելում կայանալիք վեհաժողովին: Վրաստանը վեհաժողովին ներկա է լինելու որպես ասպիրանտ երկիր եւ դաշինքի արժանի գործընկեր:
Գեորգի Մարգվելաշվիլին նշել է, որ Վրաստանը նպատակաուղղված գնում է ՆԱՏՕ-ի հետ ինտեգրացիայի: ՆԱՏՕ-ի գլխավոր քարտուղարը հաստատել է դաշինքի ամուր աջակցությունը Վրաստանի ինքնիշխանությանն ու տարածքային ամբողջականությանը:
Փորձագետներն սկսել են ավելի վստահ խոսել, որ ամռանը ՆԱՏՕ-ի համաժողովին Վրաստանը դաշինք մտնելու «թույլտվություն» կստանա: Ընդ որում, խոսվում է անգամ Վրաստանի համար ՆԱՏՕ-ի կանոնակարգում փոփոխություններ կատարելու հնարավորության մասին: Արեւմուտքը չի թաքցնում Վրաստանի ու տարածաշրջանի հանդեպ հետաքրքրությունը:
Ինչու՞ է Վրաստանն այդքան կարեւոր Դաշինքի համար: Ինչպես նշում են վերլուծաբանները, Վրաստանի անդամակցությունը ՆԱՏՕ-ին կարող է էականորեն փոխել ուժերի դասավորությունը մեծ տարածաշրջանում: Այս գործընթացը չի կարող ուղիղ կամ անուղղակի չազդել Հայաստանի, Ադրբեջանի, Ռուսաստանի եւ Թուրքիայի վրա: Ինչպե՞ս են դասավորվելու Վրաստանի հարաբերությունները Հայաստանի ու Ադրբեջանի հետ անդամակցության դեպքում: Եվ պատահակա՞ն էր, որ օրերս Վրաստանն ու Ադրբեջանը ստորագրեցին ռազմական համագործակցության համաձայնագիրը:
Իր հերթին, Վրաստանի իշխող կուսակցությունը փորձում է խուսափել տարածաշրջանում ուղիղ հակամարտությունից: Վրաստանի վարչապետ Գիորգի Կվիրիկաշվիլին այս շաբաթ Երեւանում էր, իսկ մարտի 11-ին կայցելի Բաքու: Պետք է ենթադրել, որ զրույցի թեմաներից մեկը Վրաստանի անդամակցությունն է ՆԱՏՕ-ին:
Երեկ Կվիրիկաշվիլին եւս մեկ անսպասելի քայլ է արել: Նա նամակ է ուղարկել Ռուսաստանի ղեկավարությանը՝ առաջարկելով «այսօրվա եւ ապագա սերունդների առաջ պատասխանատվությունը գիտակցելով՝ ստեղծված բարդ իրավիճակը հաղթահարելու համար համատեղ քայլեր ձեռնարկել»:
«Այս տարվա օգոստոսին լրանում է 2008 թվականի պատերազմի 10 տարին: Այդ դրամատիկ իրադարձությունը խորը հետք է թողել վրաց ժողովրդի գիտակցության մեջ եւ Վրաստանի ու Ռուսաստանի հարաբերություններում: Խզվել են դիվանագիտական հարաբերությունները: Մոսկվայի կողմից Աբխազիայի եւ Ցխինվալի շրջանի անկախության ճանաչումը փակուղի է մտցրել նորմալ միջպետական հարաբերությունների հաստատման հեռանկարը», նշված է նամակում:
Վրաստանի վարչապետը հաստատել է, որ պատրաստ է անձամբ մասնակցել Ժնեւի գործընթացին եւ ուղիղ երկխոսություն սկսել աբխազների ու օսերի հետ:
Արդյոք սա Վրաստանի առաջարկն է Ռուսաստանին՝ քննարկել ՆԱՏՕ-ին Վրաստանի հնարավոր անդամակցությունը: Ակնհայտ է, որ առանց Ռուսաստանի հետ երկխոսության ՆԱՏՕ-ին Վրաստանի անդամակցությունը կարող է նոր առճակատման պատճառ դառնալ: Դա, իր հերթին, կարող է ՆԱՏՕ-Ռուսաստանի հակամարտության նոր ճակատի վերածվել:
Ռուսաստանի հետ հարաբերությունների հարցերով Վրաստանի վարչապետի հատուկ ներկայացուցիչ Զուրաբ Աբաշիձեն կարծում է, որ Կվիրիկաշվիլիի ուղերձին կհետեւի ռուսական կողմի արձագանքը:
«Կվիրիկաշվիլին այդ հայտարարությամբ հնչեցրել է մեր երկրի կոնկրետ, խելամիտ առաջարկը Ռուսաստանին: Դժվար է կանխատեսել, սակայն կարծում եմ, որ վարչապետն արել է այն բարդ քայլը, որը պետք է աներ», – ասել է Զուրաբ Աբաշիձեն:
Բրյուսելում ՆԱՏՕ-ի համաժողովը կարող է կրկին չբացել Վրաստանի ճանապարհը դեպի ՆԱՏՕ: Սակայն աշխարհքաղաքական իրավիճակի փոփոխությունը, Արեւմուտքի ու Ռուսաստանի հարաբերությունների սրումը կարող է հանգեցնել կտրուկ քայլերի: Դրանք կազդեն ողջ տարածաշրջանի վրա: Կվիրիկաշվիլին այս թեմայով խոսե՞լ է Սարգսյանի ու Ալիեւի հետ:
ՆԱԻՐԱ ՀԱՅՐՈՒՄՅԱՆ
